മദ്യപിച്ച്‌ മോഷ്ടിക്കാൻകയറിയ കള്ളൻ കൃത്യത്തിനിടെ ഉറങ്ങിപ്പോയി. കാട്ടൂർ രാംനഗറിലെ നെഹ്‌റു സ്ട്രീറ്റില്‍ താമസിക്കുന്ന രാജന്റെ വീട്ടില്‍ കയറിയ മോഷ്ടാവ്, കരുമത്താംപട്ടി സ്വദേശി ബാലസുബ്രഹ്മണ്യനാണു മോഷ്ടിക്കാൻ സാധനങ്ങള്‍ തിരയുന്നതിനിടെ ഇറങ്ങിപ്പോയത്.തുടർന്ന് വീട്ടുടമയും പോലീസും ചേർന്ന് കള്ളനെ പിടികൂടി.
കഴിഞ്ഞദിവസം പകല്‍സമയത്ത് രാജൻ വീട് പൂട്ടി ഭാര്യാവീട്ടിലേക്കുപോയ സമയത്താണ് ബാലസുബ്രഹ്മണ്യൻ മോഷണത്തിനെത്തിയത്. മദ്യപിച്ചെത്തിയ ബാലസുബ്രഹ്മണ്യൻ വീട് കുത്തിത്തുറന്ന് അകത്തുകടന്ന് പണവും ആഭരണവും തേടി എല്ലാ മുറികളിലും പരിശോധന നടത്തി. ഇതിനിടെ മദ്യലഹരിയില്‍ കിടപ്പുമുറിയില്‍ കിടന്ന് ഉറങ്ങി.മണിക്കൂറുകള്‍ക്ക് ശേഷം രാജൻ തിരികെയെത്തിയപ്പോള്‍ വീട് തുറന്നുകിടക്കുന്നതാണ് കണ്ടത്. സംശയം തോന്നി സുഹൃത്തിനെ വിളിച്ചുവരുത്തി വീടിനകത്ത് പരിശോധിച്ചപ്പോള്‍ ഒരാള്‍ ഉറങ്ങിക്കിടക്കുന്നതാണ് കണ്ടത്.
ഉടൻ കാട്ടൂർ പോലീസിനെ വിവരമറിയിച്ചു. എസ്.ഐ.മാരായ പളനിച്ചാമി, പെരുമാള്‍സ്വാമി എന്നിവരുടെ നേതൃത്വത്തിലുള്ള പോലീസ് സംഘം സ്ഥലത്തെത്തി മോഷ്ടാവിനെ വിളിച്ചുണർത്തി കസ്റ്റഡിയിലെടുത്തു. ചോദ്യംചെയ്യലില്‍ മോഷ്ടിക്കാൻ കയറിയതാണെന്ന് പ്രതി സമ്മതിച്ചതായി പോലീസ് വ്യക്തമാക്കി. പ്രതിയെ കോടതിയില്‍ ഹാജരാക്കി റിമാൻഡ് ചെയ്തു.
