ഇന്ത്യയുടെ സാംസ്‌കാരിക പാരമ്ബര്യവും ചരിത്രവും സമ്ബന്നവും വൈവിധ്യമുള്ളതുമാണെന്നും അത് മനസ്സിലാക്കാൻ കാശ്മീർ മുതല്‍ കന്യാകുമാരി വരെയുള്ള സംസ്‌കാരങ്ങള്‍ മനസ്സിലാക്കണമെന്നും ഗവർണർ ആരിഫ് മുഹമ്മദ് ഖാൻ.
കേന്ദ്ര യുവജനകാര്യ, കായിക മന്ത്രാലയം, ആഭ്യന്തര മന്ത്രാലയം, നെഹ്റു യുവ കേന്ദ്ര എന്നിവയുടെ സംയുക്താഭിമുഖ്യത്തില്‍ സംഘടിപ്പിച്ച നാലാമത് കാശ്മീർ യൂത്ത് എക്സ്ചേഞ്ച് പരിപാടി ഉദ്ഘാടനം ചെയ്തു സംസാരിക്കുകയായിരുന്നു ഗവർണർ. ഇത്തരം പരിപാടികള്‍ യുവ തലമുറയ്ക്ക് വിവിധ സംസ്‌കാരങ്ങള്‍ മനസിലാക്കാനുള്ള അവസരം ഒരുക്കും. സമാധാനം, വികസനം, പുരോഗതി എന്നിവയെ കുറിച്ചുള്ള സംഭാഷണങ്ങളില്‍ കാശ്മീരില്‍ നിന്നുള്ള യുവശബ്ദങ്ങള്‍ അത്യന്താപേക്ഷിതമാണ്.
1972-ല്‍ കേന്ദ്ര യുവജനകാര്യ കായിക മന്ത്രാലയത്തിന് കീഴിലുള്ള സ്വയംഭരണ സ്ഥാപനമായി സ്ഥാപിതമായ നെഹ്റു യുവകേന്ദ്രം ഇന്ന് ഏറ്റവും വലിയ അടിസ്ഥാനതല യുവജന സംഘടനയായി വളർന്നു കഴിഞ്ഞു. നമ്മുടെ ഗ്രാമീണ യുവാക്കളുടെ വ്യക്തിത്വത്തെ സമ്ബന്നമാക്കുന്ന നടപടികള്‍ സ്വീകരിക്കുന്നതില്‍ മികച്ച പ്രവർത്തനം നടത്തുന്നുണ്ട്. വികസിത ഭാരതത്തിന്റെ സാക്ഷാത്കാരത്തിന് യുവതലമുറ സംഭാവന നല്‍കുന്നതിന് പ്രതികൂല സാഹചര്യങ്ങള്‍ തടസ്സമാകരുതെന്ന് ഗവർണർ അഭിപ്രായപ്പെട്ടു.
ഗിരിദീപം കണ്‍വൻഷൻ സെന്ററില്‍ നടന്ന ചടങ്ങില്‍ സെൻട്രല്‍ ബ്യൂറോ ഓഫ് കമ്മ്യൂണിക്കേഷൻ – കേരള മേഖല ഡയറക്ടർ വി. പാർവ്വതി, ജമ്മു കാശ്മീർ യൂത്ത് കണ്ടിജന്റ് ലീഡർ അസിസ്റ്റന്റ് പ്രൊഫസർ മുനീർ ഹുസ്സൈൻ ആസാദ്, നെഹ്റു യുവ കേന്ദ്ര കേരള സ്റ്റേറ്റ് ഡയറക്ടർ എം. അനില്‍കുമാർ, ജില്ലാ യൂത്ത് ഓഫീസർ സന്ദീപ് കൃഷ്ണൻ എന്നിവർ സംസാരിച്ചു.
സ്വച്ഛതാ പ്രോഗ്രാമുമായി ബന്ധപ്പെട്ട് മലപ്പുറം, കണ്ണൂർ, കോഴിക്കോട്, തൃശ്ശൂർ ജില്ലാ യൂത്ത് ഓഫീസർമാർക്കുള്ള പുരസ്‌ക്കാരങ്ങള്‍ ഗവർണർ ചടങ്ങില്‍ വിതരണം ചെയ്തു.
