ചാലക്കുടി നഗരസഭയിലെ സ്വതന്ത്ര കൗണ്സിലർ ടി.ഡി. എലിസബത്ത് യു.ഡി.എഫില് ചേർന്നതായി വാർത്താ സമ്മേളനത്തിലൂടെ അറിയിച്ചു.
20-ാം വാർഡായ ഹൗസിംഗ് ബോർഡ് കോളനിയെയാണ് എലിസബത്ത് പ്രതിനിധാനം ചെയ്തിരുന്നത്. ഇതോടെ 36 അംഗ കൗണ്സിലില് യു.ഡി.എഫ്. അംഗസംഖ്യ 29 ആയി ഉയർന്നു. നേരത്തെ സ്വതന്ത്രയായി വിജയിച്ച റോസി ലാസർ, ബിജെപി സ്വതന്ത്രന് വത്സന് ചമ്ബക്കര എന്നിവരും കോണ്ഗ്രസില് ചേർന്നിരുന്നു.
അതേസമയം ചെന്നിത്തല തൃപ്പെരുന്തുറ ഗ്രാമ പഞ്ചായത്ത് അംഗവും ദളിത് കോണ്ഗ്രസ് മുൻ സംസ്ഥാന വൈസ് പ്രസിഡന്റുമായ ഷിബു കിളിയമ്മൻതറയില് കോണ്ഗ്രസ് അംഗത്വം രാജിവച്ചു. ഡി.സി.സി. പ്രസിഡൻ്റ് ബാബു പ്രസാദിന് രാജിക്കത്ത് കൈമാറിയ ശേഷമാണ് ഷിബു രാജി പ്രഖ്യാപിച്ചത്. ചെന്നിത്തലയിലെ കോണ്ഗ്രസ് നേതൃത്വം വഞ്ചിച്ചെന്നും കരാർ പ്രകാരമുള്ള വൈസ് പ്രസിഡൻ്റ് സ്ഥാനം നല്കിയില്ലെന്നും ആരോപിച്ചാണ് രാജി.
