കേരള ചരിത്രത്തിലെ മഹത്തായ മുഹൂർത്തമാണ് കേരള അർബൻ കോണ്‍ക്ലേവ് എന്ന് തദ്ദേശ സ്വയംഭരണ വകുപ്പ് മന്ത്രി എം.ബി രാജേഷ് പറഞ്ഞു.
കോണ്‍ക്ലേവിന്റെ ഉദ്ഘാടന ചടങ്ങില്‍ അധ്യക്ഷത വഹിച്ച്‌ സംസാരിക്കുകയായിരുന്നു അദ്ദേഹം. ഈ കോണ്‍ക്ലേവ് ഒരു തുടക്കമല്ല, മറിച്ച്‌ ഒരു വർഷം നീണ്ടുനിന്ന ആശയ കൈമാറ്റങ്ങളുടെയും സംവാദങ്ങളുടേയും പരിസമാപ്തിയാണ്. ലോകത്തിൻറെ വിവിധ ഭാഗങ്ങളില്‍ നിന്നുള്ള വിദഗ്ധർ ഈ പ്രക്രിയയില്‍ പങ്കാളികളായിരുന്നു.
കേരളത്തിലെ നഗരവല്‍ക്കരണത്തെ സ്വാഭാവിക പ്രക്രിയയായി കാണാൻ കഴിയില്ല. സാധാരണഗതിയില്‍ നഗരത്തിലേക്ക് ആളുകള്‍ കുടിയേറുകയും ഘട്ടം ഘട്ടമായി നഗരം വികസിക്കുകയുമാണ് ചെയ്യുന്നത്. എന്നാല്‍ കേരളത്തില്‍ ഓരോ ഗ്രാമങ്ങളും നഗരങ്ങളായി വളരുകയാണ്.
കേരളത്തിന്റെ തനതായ ഗ്രാമ-നഗര സഹവർത്തിത്വ രീതി സവിശേഷമായ വെല്ലുവിളികള്‍ ഉയർത്തിയിട്ടുണ്ട്, നഗരവല്‍ക്കരണത്തിന്റെ വേഗം കൂടിയതോടെ ഇത് വർദ്ധിച്ചു. ഈ വെല്ലുവിളികളെ നേരിടാൻ സംസ്ഥാന സർക്കാർ നിരന്തരമായി മുൻകൈ എടുക്കുകയാണ്.
കെസ്മാർട്ട് ആപ്ലിക്കേഷനിലൂടെ സേവന വിതരണത്തിലെ വിടവുകള്‍ നികത്തിയത് മുതല്‍, ഡിജിറ്റല്‍ സാക്ഷരതാ യജ്ഞമായ ഡിജി കേരളത്തിലൂടെ ഡിജിറ്റല്‍ സാക്ഷരത ഉറപ്പാക്കിയത് വരെ നമ്മുടെ വലിയ നേട്ടങ്ങളാണ്. മാലിന്യ സംസ്കരണത്തില്‍ ശ്രദ്ധ കേന്ദ്രീകരിച്ചുള്ള ഇടപെടലുകള്‍ വിജയകരമായി മുന്നോട്ട് പോകുന്നു.
ലോകമെമ്ബാടും, നഗരവല്‍ക്കരണത്തിന്റെ പ്രത്യാഘാതങ്ങളിലൊന്ന് ദുർബല വിഭാഗത്തിന്റെ പാർശ്വവല്‍ക്കരണമാണ്.
എന്നാല്‍ നമ്മുടെ നയം എല്ലാ വിഭാഗങ്ങളെയും ഉള്‍ക്കൊള്ളുക എന്നതാണ്.
ആ നയത്തിന്റെ ഭാഗമായാണ് അതിദാരിദ്ര്യനിർമ്മാർജന പരിപാടി സംസ്ഥാന സർക്കാർ അവതരിപ്പിച്ചത്. അടിസ്ഥാന സേവനങ്ങള്‍ എല്ലാവർക്കും ലഭ്യമാക്കുന്നതിലൂടെ അതിദാരിദ്ര്യം പൂർണ്ണമായും ഇല്ലാതാക്കുന്നു, ചൈനക്ക് ശേഷം ഈ നേട്ടം കൈവരിക്കുന്ന ഏക സംസ്ഥാനമായി കേരളം മാറുകയാണ്.
നഗര തദ്ദേശ സ്വയംഭരണ സ്ഥാപനങ്ങളുടെ കുറ്റമറ്റ സേവന വിതരണം കേരളത്തിന്റെ ഈസ് ഓഫ് ഡൂയിംഗ് ബിസിനസ്സ് റാങ്കിംഗിലെ വലിയ മുന്നേറ്റത്തില്‍ നിർണായക ഘടകമാണ് – മന്ത്രി പറഞ്ഞു.
