റാപ്പർ വേടന്റെ സംഗീതപരിപാടി സംഘടിപ്പിച്ചതിനെ വിമർശിച്ച് ഗായിക ചിന്മയി ശ്രീപാദ. നിർമാതാവ് കണ്ണൻ രവിയുടെ മകന്റെ വിവാഹച്ചടങ്ങിൽ ലൈംഗികാതിക്രമ ആരോപണം നേരിടുന്ന വേടന്റെ സംഗീതപരിപാടി സംഘടിപ്പിച്ചതിനെതിരെയാണ് ചിന്മയിയുടെ പ്രതികരണം.
സിനിമാപ്രവർത്തകൻ ഹരീഷിന്റെ എക്സ് പോസ്റ്റിന് മറുപടിയായാണ് ചിന്മയി രംഗത്തെത്തിയത്. വേടനെതിരെ ഉയർന്ന ആരോപണങ്ങൾ താനുൾപ്പെട്ട പൊതുസമൂഹത്തിലാണ് ആദ്യം പങ്കുവയ്ക്കപ്പെട്ടതെന്ന് ചിന്മയി കുറിച്ചു.
ലൈംഗിക പീഡന ആരോപണം നേരിട്ട വ്യക്തി പങ്കെടുക്കുന്ന സംഗീതപരിപാടിയായി ഒരു കുടുംബച്ചടങ്ങ് മാറിയെന്നായിരുന്നു ഹരീഷിന്റെ വിമർശനം. ഈ പോസ്റ്റ് പങ്കുവച്ചുകൊണ്ടാണ് ചിന്മയി പ്രതികരിച്ചത്.
വേടനെതിരായ ആരോപണങ്ങൾ ആദ്യം പങ്കുവയ്ക്കപ്പെട്ടത് താനും അംഗമായ ഒരു പൊതുവേദിയിലാണെന്ന് ചിന്മയി വ്യക്തമാക്കി. ആരോപണം ഉന്നയിച്ച സ്ത്രീ മലയാളത്തിൽ പറഞ്ഞ കാര്യങ്ങൾ മറ്റൊരാൾ തനിക്ക് വിവർത്തനം ചെയ്തുനൽകുകയായിരുന്നുവെന്നും അവർ കുറിച്ചു.
അതേസമയം, ഗായകൻ കാർത്തിക്കിന് വേദി ലഭിക്കാമെങ്കിൽ അതേ മാനദണ്ഡം പരിഗണിക്കുമ്പോൾ വേടനും വേദി ലഭിക്കാൻ അർഹതയുണ്ടെന്നാണ് തനിക്ക് തോന്നുന്നതെന്നും ചിന്മയി പ്രതികരിച്ചു.
