മൂന്ന് പേരുടെ മരണത്തിന് ഇടയാക്കിയ കൊല്ലം കൊട്ടാരക്കര ടിപ്പര് ലോറി അപകടത്തില് ടിപ്പര് ഉടമ അക്ബറിനെയും കേസില് പ്രതി ചേര്ക്കും.
ലോറി ഉടമയ്ക്ക് സംഭവിച്ചത് ഗുരുതര വീഴ്ചയാണെന്ന് പൊലീസ് പറഞ്ഞു.മോട്ടോര് വാഹന വകുപ്പിന്റെ റിപ്പോര്ട്ട് ലഭിച്ച ശേഷമായിരിക്കും ഉടമയെ പ്രതി ചേര്ക്കുക
ഹെവി ലൈസന്സ് ഇല്ലാത്ത ആള്ക്ക് വാഹനം ഓടിക്കാന് നല്കിയത് അക്ബര് അറിഞ്ഞുകൊണ്ടാണെന്നാണ് പൊലീസിൻ്റെ കണ്ടെത്തല്.ടിപ്പര് ലോറിയുടെ ജിപിഎസ് പ്രവര്ത്തനക്ഷമമായിരുന്നില്ല. സ്പീഡ് ഗവര്ണറും ഇല്ലെന്ന് മോട്ടോര് വാഹന വകുപ്പ് കണ്ടെത്തിയിട്ടുണ്ടായിരുന്നു. ഇത് ഗുരുതര വീഴ്ചയാണെന്ന് പൊലീസ് പറഞ്ഞിരുന്നു. വാഹനത്തിന്റെ ഫിറ്റ്നസ് റദ്ദാക്കുകയും പെര്മിറ്റ് റദ്ദാക്കാനുള്ള നടപടികള് ഉടന് ആരംഭിക്കുമെന്നും എംവിഡി അറിയിച്ചിരുന്നു.
സംഭവത്തില് ഡ്രൈവര്ക്കെതിരെ നരഹത്യയ്ക്ക് പൊലീസ് കേസെടുക്കുകയും ചെയ്തിരുന്നു. എഫ്ഐആറിന്റെ പകർപ്പ് റിപ്പോർട്ടറിന് ലഭിച്ചിരുന്നു. അശ്രദ്ധമായി വാഹനം ഓടിച്ച് മനുഷ്യജീവന് ആപത്തുണ്ടാക്കിയ വകുപ്പുകളും ഉള്പ്പെടുത്തിയാണ് കേസെടുത്തിരുന്നത്. കൂടുതല് വകുപ്പുകള് തുടർ പരിശോധനയ്ക്ക് ശേഷം ഉള്പ്പെടുത്തും.
