ഇൻവെസ്റ്റ് കേരള ഗ്ലോബല്‍ സമ്മിറ്റ് നിക്ഷേപ അവസരങ്ങള്‍ക്ക് വഴിയൊരുക്കി വ്യവസായരംഗത്ത് വൻ മുന്നേറ്റം സാധ്യമാക്കിയെന്ന് വ്യവസായ വകുപ്പ് മന്ത്രി പി.
രാജീവ് പറഞ്ഞു. അങ്കമാലിയിലെ കേരള സ്റ്റേറ്റ് ഇൻഡസ്ട്രിയല്‍ ഡെവലപ്മെന്റ് കോർപ്പറേഷൻ ബിസിനസ് പാർക്കില്‍,ആർ സി സി ന്യൂട്രാഫില്‍ പ്രൈവറ്റ് ലിമിറ്റഡ് യൂണിറ്റിന്റെ തറക്കല്ലിടല്‍ കർമ്മം നിർവഹിക്കുകയായിരുന്നു മന്ത്രി.
ഇൻവെസ്റ്റ് കേരള ഗ്ലോബല്‍ സമ്മിറ്റില്‍ പ്രഖ്യാപിച്ച സുപ്രധാന നിക്ഷേപങ്ങളില്‍ ഒന്നാണിത്.ഇൻവെസ്റ്റ് കേരള ഗ്ലോബല്‍ സമ്മിറ്റില്‍ ഒപ്പുവെച്ചവയില്‍ ഇതുവരെ 35,000 കോടി രൂപയുടെ പദ്ധതികള്‍ നടപ്പാക്കി . മറ്റു സംസ്ഥാനങ്ങളെ അപേക്ഷിച്ച്‌ വളരെ വേഗത്തില്‍ നിക്ഷേപ കരാറുകള്‍ നടപ്പിലാക്കപ്പെടുന്നു എന്നത് കേരളത്തിന്റെ ശക്തിയാണ്. അദാനി ഗ്രൂപ്പിന്റെ കളമശ്ശേരി ലോജിസ്റ്റിക്സ് പാർക്കിനും വിവിധ മേഖലകളിലെ ബില്യണ്‍ ഡോളർ പദ്ധതികള്‍ക്കും കേരളം വേദിയാകുകയാണ്. ആദ്യ ഘട്ട നിക്ഷേപങ്ങള്‍ വിജയകരമായി നടപ്പിലായാല്‍ കൂടുതല്‍ പദ്ധതികള്‍ക്കും വൻതോതില്‍ നിക്ഷേപങ്ങള്‍ക്കും വാതില്‍ തുറക്കുമെന്നും മന്ത്രി പറഞ്ഞു.
പുതിയ റിപ്പോർട്ടുകള്‍ പ്രകാരം കേരളത്തില്‍ റിവേഴ്സ് മൈഗ്രേഷൻ 176 ശതമാനമായി വർദ്ധിച്ചിട്ടുണ്ടെന്നും 40000 ല്‍ അധികം പ്രൊഫഷണലുകള്‍ വിവിധ രാജ്യങ്ങളില്‍ നിന്നും മറ്റു സംസ്ഥാനങ്ങളില്‍ നിന്നും തിരികെ കേരളത്തിലേക്ക് വന്നു കൊണ്ടിരിക്കുകയാണെന്നും മന്ത്രി പറഞ്ഞു. കേരളത്തിലെ സുരക്ഷിതവും സമ്ബന്നവുമായ അന്തരീക്ഷമാണ് ഇതിന് കാരണമെന്നും അദ്ദേഹം സൂചിപ്പിച്ചു.
ഫുഡ് പ്രൊസസിങ്ങ്, ലൈഫ് സയൻസ് മേഖലയില്‍ വലിയ മുന്നേറ്റ സാധ്യതകള്‍ക്ക് വഴിതുറന്നു കൊണ്ടാണ് ആർ സി സി ന്യൂട്രാഫിലിന്റെ യൂണിറ്റ് അങ്കമാലിയില്‍ ആരംഭിക്കുന്നത്. ഇതിലൂടെ കേരളത്തിലേക്ക് കൂടുതല്‍ നിക്ഷേപകരെ ആകർഷിക്കാൻ കഴിയുമെന്നാണ് പ്രതീക്ഷിക്കുന്നത്. പുതിയ യൂണിറ്റിന്റെ നിർമ്മാണം പൂർത്തിയായി ആദ്യമാസങ്ങളില്‍ തന്നെ നൂറിലധികം തൊഴിലവസരങ്ങള്‍ ഇവിടെ ലഭ്യമാകും.
ലൈഫ് സയൻസ്, ഫാസ്റ്റ് മൂവിങ്ങ് കണ്‍സ്യൂമർ ഗുഡ്സ് വിഭാഗത്തില്‍ ഉള്‍പ്പെടുന്ന ഉല്‍പന്നങ്ങളുടെ നിർമ്മാണത്തിനൊപ്പം കോള്‍ഡ് സ്റ്റോറേജും സംഭരണ ശാലയും ആർ ആൻ്റ് ഡി സൗകര്യവുമെല്ലാം ഉള്‍ക്കൊള്ളുന്നതായിരിക്കും പുതിയ യുണിറ്റ് . ഇറ്റലി, ജർമ്മനി എന്നീ രാജ്യങ്ങളില്‍ നിന്ന് ഇറക്കുമതി ചെയ്ത മെഷിനറികള്‍ ഉപയോഗപ്പെടുത്തി അത്യാധുനിക സൗകര്യങ്ങളോടെ ദീർഘകാലം ഈടുനില്‍ക്കുന്ന ഉല്‍പന്നങ്ങള്‍ നിർമ്മിക്കാൻ കഴിയുന്ന രീതിയിലായിരിക്കും യൂണിറ്റിലെ സജ്ജീകരണങ്ങള്‍.
രാജ്യത്ത് കോവിഡ് വാക്സിൻ വികസിപ്പിച്ചെടുക്കുന്നതില്‍ മുഖ്യപങ്കുവഹിച്ച ഡോ. കൃഷ്ണ എല്ലയുടെ പുതിയ സംരംഭമാണ് ആർ സി സി ന്യൂട്രാഫില്‍ പ്രൈവറ്റ് ലിമിറ്റഡ്.
ചടങ്ങില്‍ റോജി എം ജോണ്‍ എം എല്‍ എ അധ്യക്ഷനായി. ജില്ലാ കളക്ടർ ജി പ്രിയങ്ക, ഭാരത് ബയോടെക് ഇന്റർനാഷണല്‍ എക്സിക്യൂട്ടീവ് ഡയറക്ടർ സായി പ്രസാദ് ദേവരാജലുലു, ഇന്നൊവേറ്റീവ് ഇൻഫ്രാ ആൻഡ് മൈനിംഗ് സൊല്യൂഷൻസ് ഹ്യൂമൻ റിസോഴ്സസ് മേധാവി വിനോദ് കൃഷ്ണ, അങ്കമാലി നഗരസഭ ചെയർമാൻ അഡ്വ. ഷിയോ പോള്‍, വാർഡ് കൗണ്‍സിലർ അജിത തുടങ്ങിയവർ ചടങ്ങിന്റെ ഭാഗമായി.
