മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ ഭരണഘടനാവിരുദ്ധ നടപടികൾക്കെതിരെ ഇന്ത്യസഖ്യം നൽകിയ ഹർജികൾ പരിഗണിച്ച സുപ്രീംകോടതി കേന്ദ്ര സർക്കാരിനും തിരഞ്ഞെടുപ്പ് കമ്മിഷനും നോട്ടിസ് അയച്ചു. തിരഞ്ഞെടുപ്പ് പ്രക്രിയയിൽ ക്രമക്കേടുകൾ ആരോപിച്ച് ഒക്ടോബർ 12ന് സുപ്രീം കോടതിയിലേക്ക് മാർച്ച് നടത്തിയ സംഭവത്തിൽ രാഹുൽ ഗാന്ധി അടക്കമുള്ള നേതാക്കൾക്കും സുപ്രീം കോടതി നോട്ടിസ് അയച്ചു. ഡൽഹിയിലെ പ്രതിഷേധവുമായി ബന്ധപ്പെട്ട 46 ഹർജികളാണ് ചീഫ് ജസ്റ്റിസ് സൂര്യ കാന്ത്, ജസ്റ്റിസ് ജോയ്മാല്യ ബാഗ്ചി എന്നിവരുടെ ബെഞ്ച് പരിഗണിച്ചത്. വിശദമായ വാദം പിന്നീട് നടക്കും.
രാഹുൽഗാന്ധി നേതൃത്വത്തിൽ നടന്ന മാർച്ചിലുണ്ടായ ചില സംഭവങ്ങളെക്കുറിച്ച് വാദം നടക്കുമ്പോൾ വിശദീകരണം തേടുമെന്ന് ചീഫ് ജസ്റ്റിസ് പറഞ്ഞു. മാർച്ചിലൂടെ കോടതിയെ ഭയപ്പെടുത്താനുള്ള ശ്രമങ്ങൾ നടന്നതായി അഭിഭാഷകർ ചൂണ്ടിക്കാണിച്ചപ്പോഴായിരുന്നു പ്രതികരണം. ‘പ്രതിഷേധത്തിനിടെ സുപ്രീം കോടതി വളപ്പിലേക്ക് ജനക്കൂട്ടം എങ്ങനെ പ്രവേശിച്ചുവെന്ന് വിശദീകരിക്കാൻ രാഹുൽ ഗാന്ധിയോട് കോടതി ആവശ്യപ്പെടും’– ചീഫ് ജസ്റ്റിസ് പറഞ്ഞു.
പ്രതിഷേധ സ്ഥലമെന്ന പദവിയിൽനിന്ന് ജന്തർ മന്തറിനെ ഒഴിവാക്കിയതിനെതിരെ സുപ്രീംകോടതി കേന്ദ്ര സർക്കാരിനും ഡൽഹി പൊലീസിനും നോട്ടിസ് അയച്ചു. മറുപടി തൃപ്തികരമല്ലെങ്കിൽ നിയമം അതിന്റെ വഴിക്ക് പോകുമെന്നും കോടതി പറഞ്ഞു. പ്രതിഷേധത്തിനിടെ വനിതാ മാധ്യമ പ്രവർത്തകർ നേരിട്ട ലൈംഗിക അതിക്രമങ്ങളെക്കുറിച്ച് അന്വേഷിക്കാൻ വനിതകൾ നയിക്കുന്ന അന്വേഷണ സമിതി വേണമെന്ന് കോടതി അഭിപ്രായപ്പെട്ടു. വിവരങ്ങൾ സീൽ ചെയ്ത കവറിൽ സമർപ്പിക്കാൻ കേന്ദ്രത്തോട് നിർദേശിച്ചു.
പൊലീസ് ഉദ്യോഗസ്ഥനിൽനിന്ന് മോശം പെരുമാറ്റമുണ്ടായെന്ന് ആരോപിച്ച വനിതാ മാധ്യമപ്രവർത്തകയ്‌ക്കെതിരെ നടപടികളൊന്നും പാടില്ലെന്ന് കോടതി നിർദേശിച്ചു. ഉപകരണങ്ങൾ പിടിച്ചെടുത്തെന്ന മാധ്യമ പ്രവർത്തകരുടെ ഹർജിയിലും കോടതി കേന്ദ്രത്തിനും ഡൽഹി പൊലീസിനും നോട്ടിസ് അയച്ചു. പൊലീസ് നടപടിക്കെതിരെ സുപ്രീം കോടതി ബാർ അസോസിയേഷനും അഡ്വക്കറ്റ്സ് ഓൺ റെക്കോർഡ് അസോസിയേഷനും സമർപ്പിച്ച ഹർജികളിലും കോടതി നോട്ടിസ് അയച്ചു. അനധികൃത തടങ്കൽ, പൊലീസ് അതിക്രമം തുടങ്ങിയ ഹർജികളിലും കോടതി അധികൃതരോട് വിശദീകരണം തേടി.
