തിരുവനന്തപുരം: പി.എസ്.സി ചെയർമാനെയും അംഗങ്ങളെയും പുറത്താക്കാൻ ഗവർണർ രാഷ്ട്രപതിക്ക് ശുപാർശ നല്‍കിയത് കൃത്യമായ ഭരണഘടനാ നടപടിക്രമങ്ങള്‍ പാലിക്കാതെയാണെന്ന് മുഖ്യമന്ത്രി വി.ഡി.
സതീശൻ. ഭരണഘടന അനുസരിച്ച്‌ ഗവർണർ സർക്കാരുമായി കൂടിയാലോചിച്ചാണ് തീരുമാനങ്ങള്‍ കൈക്കൊള്ളേണ്ടതെന്ന് അദ്ദേഹം പറഞ്ഞു. മന്ത്രിസഭാ യോഗത്തിന് ശേഷം നടത്തിയ വാർത്താസമ്മേളനത്തിലാണ് മുഖ്യമന്ത്രി ഇക്കാര്യം വ്യക്തമാക്കിയത്.
ഗവർണറുടെ നടപടിക്രമങ്ങളിലെ വീഴ്ച ചൂണ്ടിക്കാണിച്ച്‌ പി.എസ്.സിയിലെ നിലവിലെ ക്രമക്കേടുകള്‍ മറച്ചുവെക്കാൻ കഴിയില്ലെന്ന് മുഖ്യമന്ത്രി കൂട്ടിച്ചേർത്തു. ഗവർണറുടെ ഈ നീക്കം ഉയർത്തിക്കാട്ടി ആരോപണവിധേയരായ ചെയർമാനെയും അംഗങ്ങളെയും സംരക്ഷിക്കാനുള്ള നീക്കമാണ് പ്രതിപക്ഷം നടത്തുന്നതെന്നും അദ്ദേഹം ആരോപിച്ചു.
പി.എസ്.സിയിലെ ക്രമക്കേടുകളെക്കുറിച്ചുള്ള അന്വേഷണത്തില്‍ ഞെട്ടിക്കുന്ന വിവരങ്ങളാണ് പുറത്തുവരുന്നതെന്ന് മുഖ്യമന്ത്രി വെളിപ്പെടുത്തി. സ്വന്തക്കാരെയും ബന്ധുക്കളെയും പാർട്ടിക്കാരെയും വഴിവിട്ട് നിയമിച്ചതായി പ്രാഥമിക അന്വേഷണത്തില്‍ വ്യക്തമായിട്ടുണ്ട്. ഇതുമായി ബന്ധപ്പെട്ട് ധാരാളം പരാതികള്‍ ഇപ്പോഴും ലഭിക്കുന്നുണ്ടെന്നും, അവയെല്ലാം അന്വേഷണസംഘത്തിന് കൈമാറുമെന്നും അദ്ദേഹം അറിയിച്ചു.
ക്രമക്കേടുകളില്‍ പങ്കാളികളായ മുഴുവൻ കുറ്റക്കാരെയും നിയമത്തിന് മുന്നില്‍ കൊണ്ടുവരുമെന്നും പി.എസ്.സിയുടെ നഷ്ടപ്പെട്ട വിശ്വാസ്യത പൂർണ്ണമായും വീണ്ടെടുക്കുമെന്നും മുഖ്യമന്ത്രി ഉറപ്പുനല്‍കി. ഇതിനായി വിട്ടുവീഴ്ചയില്ലാത്തതും കാർക്കശ്യം നിറഞ്ഞതുമായ നിലപാടായിരിക്കും സർക്കാർ സ്വീകരിക്കുകയെന്നും അദ്ദേഹം വ്യക്തമാക്കി.
