ഗ്രീന്‍ ഹൈഡ്രജന്‍ എനര്‍ജിയില്‍ പ്രവര്‍ത്തിക്കുന്ന ലോകത്തെ ആദ്യ ഹൈബ്രിഡ് കണ്ടെയ്‌നര്‍ കപ്പലിന്‍റെ നിര്‍മാണക്കരാര്‍ നേടി കൊച്ചിന്‍ ഷിപ്പ്‌യാര്‍ഡ് ലിമിറ്റഡ്.

നെതര്‍ലാന്‍ഡ്സിലെ റോട്ടര്‍ഡാം ആസ്ഥാനമായി പ്രവര്‍ത്തിക്കുന്ന സാംസ്‌കിപ്പ് ഗ്രൂപ്പാണ് രണ്ടു സീറോ എമിഷന്‍ ഫീഡര്‍ കണ്ടെയ്‌നര്‍ വെസലുകളുടെ രൂപകല്പനയ്ക്കും നിര്‍മാണത്തിനുമുള്ള കരാര്‍ നല്‍കിയത്.

45 അടി നീളമുള്ള 365 കണ്ടെയ്‌നറുകള്‍ വഹിക്കാന്‍ ശേഷിയുള്ള കപ്പലാണു നിര്‍മിക്കുന്നത്. 550 കോടിയാണ് കരാര്‍ തുക. ആത്യന്തികമായി ഹൈഡ്രജന്‍ ഫ്യൂവല്‍ സെല്ലുകള്‍ ഉപയോഗിച്ചാണ് കപ്പല്‍ പ്രവര്‍ത്തിപ്പിക്കുന്നത്.

അത്യാവശ്യ ഘട്ടത്തില്‍ പ്രവര്‍ത്തിപ്പിക്കുന്നതിനായി ഡീസല്‍ ജനറേറ്റര്‍ ബാക്കപ്പും ഉണ്ട്. 2025 ഓടെ ആദ്യ കപ്പല്‍ നിര്‍മിച്ച്‌ കൈമാറും. 1990 ല്‍ സ്ഥാപിതമായ സാംസ്‌കിപ്പ് ഗ്രൂപ്പിന് യൂറോപ്പ്, അമേരിക്ക, ഏഷ്യ, ഓസ്‌ട്രേലിയ എന്നിവിടങ്ങളിലെ 24 രാജ്യങ്ങളില്‍ ഓഫീസുകളുണ്ട്.