• 20 Oct 2020
  • 07: 57 AM
Latest News arrow

സൈബര്‍ ആക്രമണത്തിന് ഇരയായാല്‍ ആര് നീതി നടത്തിത്തരും?

തിരുവനന്തപുരത്തെ അശ്ലീല യൂട്യൂബറെ മൂന്ന് പെണ്ണുങ്ങള്‍ ചേര്‍ന്ന് കൈകാര്യം ചെയ്തത് വാര്‍ത്തയായതോടെയാണ് സൈബര്‍ നിയമങ്ങളും സ്ത്രീ സുരക്ഷയും വീണ്ടും വലിയ ചര്‍ച്ചയാകുന്നത്. സൈബര്‍ ഇടത്തില്‍ ഒരു സ്ത്രീ അപമാനിക്കപ്പെട്ടാല്‍ എങ്ങിനെയാണ് നമ്മുടെ നീതി ന്യായ സംവിധാനം പ്രവര്‍ത്തിക്കുന്നത്? എന്താണ് അതിനുള്ള പരിമിതി? 

കംപ്യൂട്ടര്‍, മൊബൈല്‍ ഫോണ്‍ ഇന്റര്‍നെറ്റ് എന്നിവ ഉപയോഗിച്ച് നടത്തുന്ന കുറ്റകൃത്യങ്ങളെല്ലാം സൈബര്‍ കുറ്റകൃത്യങ്ങളുടെ പരിധിയില്‍പ്പെടും. മറ്റൊരാളുടെ മൊബൈല്‍ ഫോണ്‍, കംപ്യൂട്ടര്‍ എന്നിവയിലേക്ക് കടന്നുകയറുക, ഇലക്ട്രോണിക് മാധ്യമങ്ങളില്‍ സ്ത്രീകളെ മോശമായി ചിത്രീകരിക്കുകയും പ്രചരിപ്പിക്കുകയും ചെയ്യുക, ലൈംഗിക ചുവയുള്ള കാര്യങ്ങള്‍ സൈബര്‍ ഇടങ്ങളില്‍ പ്രസിദ്ധീകരിക്കുകയും പ്രചരിപ്പിക്കുകയും ചെയ്യുക, സോഷ്യല്‍ ഇടങ്ങളില്‍ മറ്റൊരാളുടെ പേരില്‍ ഫെയ്ക്ക് അക്കൗണ്ടുണ്ടാക്കുക, അക്കൗണ്ട് ഹാക്ക് ചെയ്യുക, ഭീഷണിപ്പെടുത്തുക, പണം തട്ടിയെടുക്കുക തുടങ്ങി രാജദ്രോഹ പ്രവര്‍ത്തനങ്ങള്‍ വരെ നീളുന്നതാണ് സൈബര്‍ കുറ്റകൃത്യങ്ങളുടെ പൊതുവായ പട്ടിക. 

സൈബര്‍ കുറ്റകൃത്യങ്ങള്‍ക്ക് ഇരയായ ഒരാള്‍ക്ക് ലോകത്ത് എവിടെ വേണമെങ്കിലും പരാതിപ്പെടാം. അതാത് ഇടങ്ങളിലെ ലോക്കല്‍ പൊലീസ് സ്റ്റേഷനിലാണ് പരാതിപ്പെടേണ്ടത്. എല്ലാ ജില്ലകളിലും പൊലീസ് സ്റ്റേഷനോട് ചേര്‍ന്ന് സൈബര്‍ സെല്ലുകളുണ്ട്. പരാതിയോടൊപ്പം പേര്, മെയില്‍ ഐഡി, മേല്‍വിലാസം, ഫോണ്‍ നമ്പര്‍ എന്നിവ നല്‍കണം. തെളിവായി സംശയമുള്ളവരുടെ പേര് വിവരങ്ങള്‍, പരാതിയ്ക്കടിസ്ഥാനമായ വെബ് പേജിന്റെ സോഫ്റ്റ് കോപ്പിയും ഹാര്‍ഡ് കോപ്പിയും സെര്‍വര്‍ ലോഗുകള്‍ തുടങ്ങി സാധ്യമായ വിവരങ്ങള്‍ നല്‍കണം. www.cybercrime.gov.in എന്ന വെബ്‌സൈറ്റിലൂടെയും പരാതിപ്പെടാം.

വിവരസാങ്കേതിക നിയമം 2008 ആണ് സൈബര്‍ കുറ്റകൃത്യങ്ങള്‍ തടയാന്‍ നിലവിലുള്ളത്. ഐടി ആക്ട് 66ഇ, 67, 67 എ, 67 ബി എന്നിവയാണ് ഇതുമായി ബന്ധപ്പെട്ട വകുപ്പുകള്‍. ഇവയില്‍ തന്നെ ഐടി ആക്ട് 66ഇ യാണ് ഏറ്റവും പ്രധാനം. സൈബര്‍ ഇടങ്ങള്‍ ഉപയോഗിച്ച് അതാത് മൊബൈല്‍ ഫോണ്‍ ആയാലും കംപ്യൂട്ടര്‍ ആയാലും മറ്റൊരാളുടെ സ്വകാര്യതയിലേക്ക് കടന്നുകയറുന്നത് ശിക്ഷാര്‍ഹമാണ്. ഒളിക്യാമറ ഉപയോഗിച്ച് സ്വകാര്യ ഭാഗങ്ങളുടെ ഫോട്ടോ എടുക്കുന്നതും പങ്കുവെയ്ക്കുന്നതും പ്രചരിപ്പിക്കുന്നതും ശിക്ഷയര്‍ഹിക്കുന്നതാണ്. നിയമപ്രകാരം മൂന്ന് വര്‍ഷം വരെ തടവും ഒരു ലക്ഷം വരെ പിഴയും ലഭിക്കാവുന്ന കുറ്റകൃത്യമായാണ് ഇതിനെ കണക്കാക്കുന്നത്. 

സ്ത്രീകളെ മോശമായി ചിത്രീകരിക്കുന്നവര്‍ക്കെതിരെ പ്രയോഗിക്കുന്ന വകുപ്പാണ് ഐടി ആക്ട് 67. അശ്ലീല വാക്കുകള്‍, പ്രയോഗങ്ങള്‍ എന്നിവ നടത്തി സ്ത്രീകളുടെ അന്തസിന് കളങ്കമുണ്ടാക്കിയാല്‍, അത്തരത്തിലുള്ള ചിത്രങ്ങള്‍ പ്രദര്‍ശിപ്പിച്ചാല്‍ ഈ വകുപ്പ് ഉപയോഗിക്കാം. മൂന്ന് ലക്ഷം വരെ തടവും അഞ്ച് ലക്ഷം വരെ പിഴയും ശിക്ഷയായി കിട്ടുന്നതാണ്. 

ലൈംഗിക കാര്യങ്ങള്‍ വിവരിക്കുന്ന തരത്തില്‍ ഓഡിയോ അല്ലെങ്കില്‍ വീഡിയോ പ്രചരിപ്പിച്ചാല്‍ ഈ വകുപ്പ് അനുസരിച്ച് നടപടിയെടുക്കാം. അഞ്ച് വര്‍ഷം വരെ തടവും പത്ത് ലക്ഷം രൂപ വരെ പിഴയും കുറ്റകൃത്യം ആവര്‍ത്തിച്ചാല്‍ 7 വര്‍ഷം തടവും പത്ത് ലക്ഷം രൂപ വരെ പിഴയുമാണ് നിയമത്തില്‍ വ്യവസ്ഥ ചെയ്യുന്നത്. 

കുട്ടികളെ ലൈംഗികമായി ചിത്രീകരിക്കുകയും അത് പ്രചരിപ്പിക്കുകയും ചെയ്യുന്നതിനെതിരെയാണ് ഐടി ആക്ട് 67 ബി എന്ന വകുപ്പ്. അഞ്ച് വര്‍ഷം വരെ തടവും പത്ത് ലക്ഷം രൂപ വരെ പിഴയും ആദ്യമായും കുറ്റകൃത്യം ആവര്‍ത്തിച്ചാല്‍ 7 വര്‍ഷം വരെ തടവും പത്ത് ലക്ഷം രൂപ വരെ പിഴയും ശിക്ഷയായി ലഭിക്കും. പോക്‌സോ നിയമവും ഈ കുറ്റകൃത്യത്തില്‍ ബാധകമാണ്. 

ഇത്രയധികം വകുപ്പുകള്‍ ഉണ്ടായിട്ടും നമ്മുടെ നാട്ടില്‍ സൈബര്‍ കുറ്റകൃത്യങ്ങള്‍ വര്‍ധിച്ചുവരികയാണ്. ഇതിനെക്കുറിച്ച് ഒരു സൈബര്‍ സെല്‍ ഉദ്യോഗസ്ഥനോട് ചോദിച്ചാല്‍ അവര്‍ പറയുക എടുത്തു കളഞ്ഞ ഒരു വകുപ്പിനെക്കുറിച്ചാകും. ഐടി ആക്ട് 66എ. സൈബര്‍ ഇടങ്ങള്‍ വഴി അലോസരപ്പെടുത്തുന്നതോ അന്തസിന് കോട്ടം തട്ടുന്നതോ ആയ പ്രസ്താവനകളും സന്ദേശങ്ങളും പ്രചരിപ്പിക്കുക, തെറ്റാണെന്ന് അറിഞ്ഞിട്ടും അപഖ്യാതി പരത്തുക, തുടങ്ങിയ കുറ്റങ്ങള്‍ക്ക് മൂന്ന് വര്‍ഷം വരെ തടവും പിഴയും കിട്ടാവുന്ന വകുപ്പാണിത്. ഈ വകുപ്പിന്റെ ദുരുപയോഗ സാധ്യത കണ്ടാണ് സുപ്രീംകോടതി ഈ വകുപ്പ് എടുത്തു കളഞ്ഞത്. ഇതിന് സമാനമായ കേരള പൊലീസ് ആക്ട് 118 ഡിയും എടുത്തുകളഞ്ഞു. 

എടുത്ത് കളഞ്ഞ ഈ വകുപ്പുകള്‍ മാത്രമല്ല, സൈബര്‍ കുറ്റകൃത്യങ്ങള്‍ക്ക് രാജ്യത്തിനകത്ത് നിന്ന് പരിഹാരം തേടുന്നതില്‍ ഏറെ പരിമിതികളുണ്ടെന്നാണ് അന്വേഷണ ഉദ്യോഗസ്ഥര്‍ വ്യക്തമാക്കുന്നത്. പല സോഷ്യല്‍ മീഡിയ സൈറ്റുകളുടെയും സെര്‍വറുകള്‍ വിവിധ രാജ്യങ്ങളിലാണ് പ്രവര്‍ത്തിക്കുന്നത്. ഉദാഹരണത്തിന് യൂട്യൂബ് സംബന്ധമായ ഒരു പരാതിയ്ക്ക് തെളിവുകളും ഫൊറന്‍സിക് വശങ്ങളില്‍ വ്യക്തതയും നല്‍കേണ്ടത് അമേരിക്കന്‍ കമ്പനിയായ യൂട്യൂബാണ്. ആ അര്‍ത്ഥത്തില്‍ കേരളത്തില്‍ ഇരുന്ന് ഒരു സൈബര്‍ ക്രൈം ചെയ്യുന്നയാളുടെ സ്ഥലപരിമിതി കേരളമാണോ ഇന്ത്യയാണോ എന്നൊന്നും സാങ്കേതികമായി സ്ഥാപിക്കാന്‍ സാധിക്കില്ല. ഫെയ്‌സ്ബുക്ക് പോസ്റ്റുകള്‍, സ്‌ക്രീന്‍ഷോട്ടുകള്‍ തുടങ്ങിയവയെല്ലാം കോടതികളില്‍ സ്വീകരിക്കുന്ന അവസ്ഥയുമുണ്ടാകണം. തെളിവുകള്‍ ശേഖരിക്കുന്നതിലും ശിക്ഷ ഉറപ്പാക്കുന്നതിലും ഉണ്ടാകുന്ന കാലതാമസം വലുതാണ്. അതുകൊണ്ട് തന്നെ കേസെടുക്കാന്‍ പലപ്പോഴും ഉദ്യോഗസ്ഥര്‍ മടി കാണിക്കുന്നു.

ഐടി ആക്ടില്‍ മാത്രമല്ല, ഇന്ത്യന്‍ ശിക്ഷാ നിയമത്തിലും വകുപ്പുകളുണ്ട്. ഐപിസി 509 പ്രകാരം അപമാനിക്കുന്ന പരാമര്‍ശം നടത്തല്‍, ഐപിസി 354 എ പ്രകാരം ലൈംഗിക ചുവയുള്ള പരാമര്‍ശം, ഐപിസി 354 സി പ്രകാരം സ്വകാര്യതയിലേക്കുള്ള കടന്നുകയറ്റം എന്നിവ ഉപയോഗിച്ച് കേസെടുക്കാം. മന്ത്രിമാര്‍ക്കും മറ്റുമെതിരായുള്ള കുറ്റകൃത്യങ്ങള്‍ക്കെതിരെ ഉടനടി നടപടിയുണ്ടാകുന്നത് മിക്കപ്പോഴും ഈ വകുപ്പുകള്‍ അടിസ്ഥാനപ്പെടുത്തിയാണ്. 

സാധാരണ ഗതിയില്‍ പൊലീസ് ഇത്തരം കേസുകളില്‍ നിഷ്‌ക്രിയരാവുകയാണ് പതിവ്. കേസെടുത്താലും ഒത്തുതീര്‍പ്പിന് ശ്രമിക്കും. അതും നടന്നില്ലെങ്കില്‍ ദുര്‍ബല വകുപ്പിട്ട് കേസെടുത്ത് സ്‌റ്റേഷന്‍ ജാമ്യത്തില്‍ വിടും. വനിതാ കമ്മീഷന്‍ അടക്കമുള്ള ഏജന്‍സികളില്‍ പരാതിയെത്തിയാലും അത് പൊലീസിന് കൈമാറാനേ നിലവില്‍ വകുപ്പുള്ളൂ. ഇതെല്ലാമുണ്ടെങ്കിലും നിയമഭേദഗതിയിലെ മെല്ലെപ്പോക്ക് പരാമര്‍ശിക്കാതിരിക്കാനും കഴിയില്ല. 

ഫെയ്‌സ്ബുക്കും ഇന്‍സ്റ്റഗ്രാമും ട്വിറ്ററുമെല്ലാം കടന്ന് ക്രിപ്‌റ്റോ കറന്‍സിയിലും ആര്‍ട്ടിഫി്ഷ്യല്‍ ഇന്റലിജന്‍സിലും വരെ ടെക്‌നോളജി എത്തിനില്‍ക്കുന്നു. എന്നിട്ടും ഐടി ആക്ടില്‍ ഒരു ഭേദഗതിയുണ്ടാക്കാന്‍ നമ്മുടെ നിയമസംവിധാനത്തിന് സാധിച്ചിട്ടില്ല.