• 10 Aug 2020
  • 02: 00 AM
Latest News arrow

യാത്രക്കാരിയുടെ ജീവന്‍ രക്ഷിയ്ക്കാന്‍ ബസ് തിരിച്ചുവിട്ടവര്‍; ബൈജുവിന്റെയും ഗിരീഷിന്റെയും വേര്‍പാട് തീരാവേദനയാകുന്നു

കൊച്ചി: തങ്ങളുടെ ബസില്‍ കയറുന്നവരെ യാത്രക്കാരേക്കാള്‍ അധികം കുടുംബാംഗങ്ങളായി കരുതുന്ന രണ്ട് ജീവനക്കാരെ നഷ്ടമായതിന്റെ വേദനയിലാണ് കെഎസ്ആര്‍ടിസി. ഒരു രോഗിയ്ക്ക് ചികിത്സ ലഭിക്കാന്‍ ബസ് തിരിച്ചോടിച്ച്, ആശുപത്രിയിലാക്കി കൂട്ടിരുന്നവരാണ് കോയമ്പത്തൂര്‍ അപകടത്തില്‍ മരിച്ച ഗിരീഷും ബൈജുവും. 2018 ജൂണ്‍ മൂന്നിന് യാത്രയ്ക്കിടെ നടന്ന ആ സംഭവം വാര്‍ത്തയായിരുന്നു. തുടര്‍ന്ന് അന്ന് കെഎസ്ആര്‍ടിസി എംഡിയ്ക്ക് വേണ്ടി ഡിടിഒ ഇവരെ ആദരിക്കുകയും ചെയ്തു. പ്രളയകാലത്ത് ബെംഗളൂരുവിലെ മലയാളികള്‍ക്ക് സഹായമെത്തിക്കാനും മുമ്പിലുണ്ടായിരുന്ന ഗിരീഷിന്റെയും ബൈജുവിന്റെയും വേര്‍പാട് സഹപ്രവര്‍ത്തകരുടെ ഉള്ളുപൊള്ളിക്കുകയാണ്. 

യാത്രക്കാരിയെ ആശുപത്രിയിലെത്തിച്ച സംഭവത്തെക്കുറിച്ച് 'കെഎസ്ആര്‍ടിസി എറണാകുളം' എന്ന ഫെയ്‌സ്ബുക്ക് പേജില്‍ ഒരു കുറിപ്പ് പോസ്റ്റ് ചെയ്തിരുന്നു. ആ കുറിപ്പ് ഇങ്ങിനെ....

യാത്രക്കാരിയുടെ ജീവന്‍ രക്ഷിക്കാന്‍ KSRTC ജീവനക്കാരുടെ ത്യാഗം…

ഒരു ജീവന് വേണ്ടി കുറച്ച് സമയത്തേക്ക് #KSRTC ബസ് തിരികെ ഓടി.!!! ഈ മാസം മൂന്നാം തീയതി (03/06/2018 )ആണ് ഡോക്ടര്‍ കവിത വാര്യര്‍ എറണാകുളം ബാഗ്ലൂര്‍ വോള്‍വോയില്‍ ത്രിശൂര്‍ നിന്നും ബംഗളൂരുവിലേക്ക് യാത്ര ആരംഭിച്ചത് . വഴിക്കു വെച്ച് ഇവര്‍ക്ക് ഫിക്‌സ് വരികയും ബസ് ജീവനക്കാരന്‍ സഹായിക്കുകയും ചെയ്തതാണ് സംഭവം. കെഎസ്ആര്‍ടിസി ജീവനക്കാരുടെ നന്മകളാണ് നാം ഇപ്പോള്‍ കുറച്ചുനാളായി വാര്‍ത്തകളില്‍ കാണുന്നു. അതിലുമേറെയായി ഒരു ജീവന്‍ രക്ഷിക്കുവാന്‍ മുന്‍കൈ എടുത്ത ജീവനക്കാരുടെ വിശേഷങ്ങളാണ് ഇനി പറയുവാന്‍ പോകുന്നത്.

ബസിലെ ജീവനക്കാരന്‍ ആയ Baiju Valakathil പറയുന്നതിങ്ങനെ – ' ഏകദേശം നേരം വെളുക്കാറായപ്പോള്‍ ഒരു യാത്രക്കാരന്‍ മുന്നിലേക്ക് വന്ന് സാര്‍ താക്കോല്‍ ഉണ്ടൊ എന്ന് ചോദിച്ചു. കാര്യം അന്വേഷിച്ചപ്പോള്‍ പുറകില്‍ ഒരു യാത്രക്കാരിക്ക് ഫിക്‌സ് ആണത്രെ.
 
ഞാന്‍ താക്കോല്‍ നല്‍കി കുറച്ചു നേരം കഴിഞ്ഞ് രണ്ടു പേര്‍ വന്നിട്ട് പറഞ്ഞു 'ചേട്ടാ ഒരു ശമനവും ഇല്ല ഹോസ്പിറ്റലിലേക്ക് കൊണ്ട് പോവണ്ടി വരും.' ബാക്കി യാത്രക്കാരും ഒന്നായ് പറഞ്ഞു അതെ അതാണ് വേണ്ടത്. അപ്പോഴേക്കും ഞങ്ങള്‍ ഹൊസൂരെത്തിയിരുന്നു. ബസ് തിരിച്ചു നേരെ ഹൈവേക്ക് തൊട്ടടുത്തുള്ള ജനനി ഹോസ്പിറ്റലിലേക്ക് വിട്ടു. യുവതിയെ ഹോസ്പിറ്റലില്‍ അഡ്മിറ്റ് ചെയ്ത ശേഷം ബാഗ്ലൂര്‍ ഐ സി യെ ഇന്‍ഫോം ചെയ്തു. വേണ്ടകാര്യങ്ങള്‍ ചെയ്ത ശേഷം എത്തിയാല്‍ മതി എന്നു നിര്‍ദ്ധേശം ലഭിച്ചു. ത്രിശൂര്‍ ഡിപ്പോയിലെ ബെന്നി സാറിനേ ഫോണ്‍ ചെയ്ത് കാര്യങ്ങള്‍ പറഞ്ഞു. 'സാര്‍ ഇവിടെ അഡ്മിറ്റ് ചെയ്യണെല്‍  അഡ്മിഷന്‍ ഡെപ്പോസിറ്റ് കെട്ടി വയ്ക്കണം.' 'അതൊന്നും ഇപ്പോള്‍ നോക്കണ്ടാ, ക്യാഷ് കെട്ടി വയ്ക്ക്. ബാക്കി നമ്മുക്ക് പിന്നീട് നോക്കാം ഒരു ജീവന്റെ കാര്യം അല്ലെ ..!' എന്ന് ബെന്നി സാര്‍ പറഞ്ഞു.

ഡോക്ടര്‍ കൂടിയായ യാത്രക്കാരിയ്ക്ക് വളരെ സീരിയസ് ആയ നിലയില്‍ ആയതിനാല്‍ ഒരാള്‍ ഇവിടെ നില്‍ക്കണം എന്നാലെ ട്രീറ്റ്‌മെന്റ് നടപടികളും ആയി മുന്നോട്ട് പോകുവാന്‍ പറ്റുകയുള്ളൂ എന്ന് ഹോസ്പിറ്റല്‍ അധികൃതര്‍ അറിയിച്ചു. ഹോസ്പ്പിറ്റലിന് റിസ്‌ക്ക് ഏറ്റെടുക്കാന്‍ പറ്റില്ലത്രെ. ആരും തന്നെ അതിന് തയ്യാറാകാതെ വന്നപ്പോള്‍ ബൈജു പറഞ്ഞു 'ഇവരുടെ (കവിത) ആരെങ്കിലും എത്തും വരെ ഞാന്‍ നില്‍ക്കാം.'കണ്‍ട്രോള്‍ റൂമില്‍ വിളിച്ച് അന്വഷിച്ചപ്പോള്‍ നിങ്ങള്‍ ഒരാള്‍ക്ക് ബസ് ഓടിച്ച് ബാഗ്ലൂര്‍ പോകാമെങ്കില്‍ ഒരാള്‍ ഹോസ്പിറ്റലില്‍ നില്‍ക്കു മറ്റൊരാള്‍ യാത്രക്കാരും ആയി യാത്ര തുടരു എന്ന നിര്‍ദേശം ലഭിച്ചു..!
 
അങ്ങനെ ബൈജു ഹോസ്പിറ്റലില്‍ നിന്നു. ബസിലെ മറ്റു യാത്രക്കാരും ആയി കൂടെയുള്ള ജീവനക്കാരനായ ഗിരീഷ് ബാഗ്ലൂരേക്ക് പുറപ്പെട്ടു. രാവിലെ 09:00 മണി ആയപ്പോഴേക്കും കവിത ഡോക്ടറുടെ (ആശുപത്രിയില്‍ അഡ്മിറ്റ് ചെയ്ത യാത്രക്കാരി) ബന്ധുക്കള്‍ എത്തി ഡിസ്ചാര്‍ജ് വാങ്ങി മറ്റൊരു ഹോസ്പിറ്റലിലേക്ക് പോയി. ബൈജുവിനെ അവര്‍ ഹൊസുര്‍ റെയില്‍വേ സ്റ്റഷനില്‍ ഡ്രോപ്പ് ചെയ്തു. ബൈജു അവിടുന്ന് ട്രെയിന്‍ കയറി ബസ് പാര്‍ക്ക് ചെയ്യുന്ന ബാഗ്ലൂര്‍ പീനിയയിലേക്ക് പുറപ്പെട്ടു….! നന്മയുടെ കരം നീട്ടിയ ഗിരീഷ് & ബൈജു ഒരായിരം അഭിനന്ദനങ്ങള്‍..

Editors Choice