കൊൽക്കത്ത: എഴുത്തുകാരിയാണ്, ചിത്രകാരിയാണ്, കവയിത്രിയാണ്, സർവ്വോപരി ഒരു സംസ്ഥാനത്തിന്റെ മുഖ്യമന്ത്രിയുമാണ്. ബംഗാൾ മുഖ്യമന്ത്രി മമത ബാനർജിയെക്കുറിച്ചാണ് പറഞ്ഞു വരുന്നത്. മമത ബാനർജി എഴുതിയ പുതിയ പുസ്തകങ്ങളുടെ പ്രകാശനം കഴിഞ്ഞ ദിവസം തുടങ്ങിയ കൊൽക്കത്ത അന്താരാഷ്ട്ര പുസ്തകമേളയിൽ നടന്നു. ബംഗാളി ഭാഷയിൽ 6 പുസ്തകങ്ങൾ, ഇംഗ്ളീഷിൽ 7 എണ്ണം, ഉറുദുവിൽ ഒന്ന് എന്നിങ്ങനെ ദീദി എഴുതിയ  14 പുതിയ പുസ്തകങ്ങളുടെ പ്രകാശനമാണ് ഒറ്റയടിക്ക് നടന്നത്. ഇതോടെ പുസ്തക രചനയിൽ ദീദി സെഞ്ചുറി പിന്നിട്ടു. ആകെ 102 പുസ്തകങ്ങളാണ് ഇപ്പോൾ മമതാ ബാനർജിയുടെ പേരിലുള്ളത്.

രാഷ്ട്രീയവും ചരിത്രവും സംസ്കാരവും സ്മരണകളും നിയമസഭാപ്രസംഗങ്ങളും മുതൽ കവിത വരെ ഈ പുസ്തകങ്ങളിലെ വിഷയങ്ങളാണ്. ഇംഗ്ലിഷും ഉറുദുവും കൂടാതെ സന്താളി ഭാഷയിലുള്ള കവിതാ പരിഭാഷകളുമുണ്ട് ദീദിയുടേതായി.

തലക്കെട്ടും കവർചിത്രവും മുതൽ പുസ്തകത്തിന്റെ എല്ലാക്കാര്യങ്ങളിലും അതീവശ്രദ്ധ പുലർത്തുന്നയാളാണ്  മമതാ ബാനർജിയെന്ന്  പ്രസാധകരായ ഡേയ്സ് പബ്ലിഷിങ് പറയുന്നു. പുതിയ ഇംഗ്ലിഷ് പുസ്തകങ്ങളിലൊരെണ്ണം പൗരത്വനിയമത്തിനെതിരെ ഉള്ളതാണ്.

ജനുവരി 29-ന് തുടങ്ങിയ പുസ്തകമേള ഫെബ്രുവരി 9-നാണ് സമീപിക്കുന്നത്.