• 26 Nov 2020
  • 08: 32 PM
Latest News arrow

ഓസ്ട്രേലിയന്‍ ഓപ്പണ്‍: മിക്‌സഡ് ഡബിള്‍സില്‍ നിന്ന് പിന്മാറിയതിനു പിന്നാലെ വനിതാ ഡബിള്‍സിലും സാനിയയ്ക്ക് തിരിച്ചടി; മത്സരം പൂർത്തിയാക്കാതെ കോർട്ട് വിട്ടു

മെല്‍ബണ്‍: ഓസ്ട്രേലിയന്‍ ഓപ്പണ്‍ ടെന്നീസിലെ മിക്‌സഡ് ഡബിള്‍സില്‍ നിന്ന് പരിക്കിനെത്തുടർന്ന് പിന്മാറിയതിനു പിന്നാലെ ഇന്ത്യയുടെ സാനിയ മിര്‍സക്ക്  വനിതാ ഡബിള്‍സിലും തിരിച്ചടിനേരിട്ടു.

യുക്രെയ്ന്‍ താരം നാദിയ കിച്‌നോക്കുമായി വനിതാ ഡബിള്‍സിൽ ആദ്യ റൗണ്ട് മത്സരിക്കാനിറങ്ങിയ സാനിയ മത്സരം പൂര്‍ത്തിയാക്കാതെ കോര്‍ട്ട് വിടുകയായിരുന്നു. വലതു കാലില്‍ പരിക്കേറ്റ ഭാഗത്ത് വേദന കൂടിയതോടെയാണ് സാനിയ മത്സരം അവസാനിപ്പിച്ചത്. സാനിയയും നാദിയയും മത്സരത്തില്‍ 6-2, 1-0ത്തിന് പിന്നില്‍ നില്‍ക്കുകയായിരുന്നു.

കഴിഞ്ഞദിവസം ഹൊബര്‍ട്ട് ഇന്റര്‍നാഷണല്‍ ടൂര്‍ണമെന്റ് ഫൈനലിനിടെ കാലിനേറ്റ പരിക്കാണ് സാനിയയെ വലച്ചത്.  മിക്‌സഡില്‍ രോഹന്‍ ബൊപ്പണ്ണ ആയിരുന്നു സാനിയയുടെ കൂട്ടാളി. പരിക്കിനെത്തുടർന്ന് രോഹന്‍ ബൊപ്പണ്ണയുമൊത്തുള്ള മികസ്ഡ് ഡബിള്‍സില്‍ നിന്ന് പിന്മാറിയിരുന്നു. പങ്കാളിയെ നഷ്ടപ്പെട്ട രോഹന്‍ ബൊപ്പണ്ണ,  വനിതാ ഡബിള്‍സില്‍ സാനിയയുടെ പങ്കാളിയായ യുക്രെയ്ന്‍ താരം നാദിയ കിച്‌നോക്കുമായി കൂട്ടുകെട്ടുണ്ടാക്കിയിരുന്നു.

നാദിയ കിച്‌നോക്ക്- സാനിയ മിർസ സഖ്യം കഴിഞ്ഞ ആഴ്ച ഹൊബര്‍ട്ട് ഇന്റര്‍നാഷണലില്‍ കിരീടം നേടിയിരുന്നു. രണ്ടു വര്‍ഷത്തെ ഇടവേളക്ക് ശേഷം അമ്മയായി കോര്‍ട്ടില്‍ തിരിച്ചെത്തിയ സാനിയയുടെ ആദ്യ കിരീടമായിരുന്നു ഇത്.