• 09 Dec 2019
  • 03: 13 PM
Latest News arrow

തെലങ്കാന സംഭവം: കുറ്റവാളികളെ ജനക്കൂട്ടത്തിന് വിട്ടുകൊടുക്കണമെന്ന് ജയാ ബച്ചൻ; ബലാത്സംഗം ചെയ്യുന്നവരോട് ദയ കാണിക്കേണ്ടതില്ലെന്ന് വെങ്കയ്യ നായിഡു; കര്‍ശന ശിക്ഷകള്‍ കൊണ്ടുവരണമെന്ന് ഗുലാം നബി ആസാദ്

ന്യൂദല്‍ഹി: തെലങ്കാനയില്‍ ഹൈദരാബാദിനടുത്ത ഷംഷാബാദിൽ ഇരുപത്തിയാറ് വയസ്സുള്ള വനിതാ വെറ്ററിനറി ഡോക്ടറെ ബലാത്സംഗം ചെയ്ത് ക്രൂരമായി കൊലപ്പെടുത്തിയ സംഭവത്തെ രാജ്യസഭ ഒന്നടങ്കം അപലപിച്ചു.

കുറ്റവാളികളെ പൊതുജനത്തിന് വിട്ട് കൊടുക്കണമെന്നും ജനക്കൂട്ടം ശിക്ഷ നടപ്പാക്കിക്കൊള്ളുമെന്നും നടിയും സമാജ്‌വാദി പാര്‍ട്ടി എംപിയുമായ ജയാ ബച്ചന്‍ പറഞ്ഞു. രാജ്യസഭയില്‍  ഈ സംഭവവുമായി  ബന്ധപ്പെട്ട ചര്‍ച്ചയില്‍ സംസാരിക്കുകയായിരുന്നു ജയാ ബച്ചന്‍. നീതി ലഭിക്കുമോയെന്ന കാര്യത്തില്‍ സര്‍ക്കാര്‍ കൃത്യമായ ഉത്തരം നല്‍കണം. നിര്‍ഭയ കേസില്‍ ഇതുവരെ നീതി ലഭിച്ചിട്ടില്ല. ഇത്തരം ആളുകളെ തല്ലിക്കൊല്ലണമെന്നും ജയാ ബച്ചൻ  പറഞ്ഞു.

ഈ സംഭവം സമൂഹത്തിനും മൂല്യവ്യവസ്ഥയ്ക്കും അപമാനമാണെന്ന് രാജ്യസഭാ ചെയര്‍മാന്‍ വെങ്കയ്യ നായിഡു പറഞ്ഞു. "എന്തുകൊണ്ടാണ് ഇത്തരം കാര്യങ്ങള്‍ സംഭവിക്കുന്നതെന്ന് അന്വേഷിക്കുകയും പരിഹാരമാര്‍ഗ്ഗങ്ങള്‍ തേടുകയും വേണം. നിങ്ങള്‍ എല്ലാവരും നിര്‍ദേശങ്ങള്‍ നൽകണമെന്ന് ഞാന്‍ ആഗ്രഹിക്കുന്നു.  ബലാത്സംഗം ചെയ്യുന്നവരോട് ഒരു ദയയും കാണിക്കേണ്ടതില്ല. പുതിയ ബില്ല് കൊണ്ടുവരുന്നില്ല; എന്നാല്‍ രാഷ്ട്രീയ ഇച്ഛാശക്തി ആവശ്യമാണ്. ഇത് മുളയിലേ നുള്ളി കളയേണ്ടതാണ്. ഇപ്പോൾ  തന്നെ നമ്മള്‍ ഏറെ വൈകി. ഇനി താമസിക്കരുത്"- വെങ്കയനായിഡു പറഞ്ഞു.

"പല നിയമങ്ങളും നമ്മള്‍ ഉണ്ടാക്കിയിട്ടുണ്ട്. അതെല്ലാം പര്യാപ്തമാണെന്ന് തോന്നുന്നു. രാജ്യം മുഴുവന്‍ ഒത്തുചേര്‍ന്ന് അത്തരം സംഭവങ്ങള്‍ നടക്കാത്ത സാഹചര്യം സൃഷ്ടിക്കേണ്ടതുണ്ട്. കര്‍ശനമായ ശിക്ഷകള്‍ കൊണ്ടുവരണം"- കോണ്‍ഗ്രസ് നേതാവ് ഗുലാം നബി ആസാദ് പറഞ്ഞു.