മുംബൈ: രണ്ടുവർഷമായി കോർട്ടിൽ നിന്നും വിട്ടുനിൽക്കുന്ന ടെന്നീസിലെ സൂപ്പര്‍ താരം സാനിയ മിർസ തിരിച്ചെത്തുന്നു.  ഗർഭിണിയായ ശേഷം ടെന്നീസിൽ നിന്ന് വിട്ടുനിൽക്കുകയായിരുന്നു സാനിയ. കഴിഞ്ഞവ‍ർഷം ഒക്‌ടോബറില്‍ ആൺകുഞ്ഞിന് ജന്മം നൽകി.

ജനുവരിയിൽ ഹൊബാർട്ട് ഇന്റ‌ർനാഷണൽ ടെന്നിസ് ടൂർണമെന്റിലൂടെയാണ് മുപ്പത്തിമൂന്നുകാരിയായ സാനിയ മിർസ കോർട്ടിലേക്ക് തിരിച്ചെത്തുക. ആറ് ഗ്രാൻസ്ലാം കിരീടം നേടിയിട്ടുള്ള സാനിയ ഓസ്‌ട്രേലിയൻ ഓപ്പണിലും കളിക്കും.അമേരിക്കൻ താരം രാജീവ് റാമിനൊപ്പം മിക്‌സഡ് ഡബിൾസിലാണ് സാനിയ ഓസ്‌ട്രേലിയൻ ഓപ്പണിൽ കളിക്കുക.

കോര്‍ട്ടിലേക്ക് തിരിച്ചെത്തുന്ന വിവരം വാർത്താസമ്മേളനത്തില്‍ സാനിയ തന്നെയാണ് അറിയിച്ചത്. മുംബൈയില്‍ ഒരു ടൂര്‍ണമെന്‍റ് കളിക്കാന്‍ പരിശ്രമിക്കുന്നതായും ടോക്യോ ഒളിംപിക്‌സ് മനസിലുണ്ടെന്നും സാനിയ വ്യക്തമാക്കി. 

2017 ഒക്ടോബറിൽ ചൈന ഓപ്പണിലാണ് സാനിയ അവസാനമായി കളിച്ചത്.