• 14 Dec 2018
  • 03: 10 AM
Latest News arrow

ടിക് ടോക്കിലെ നില്ല് നില്ല് ചലഞ്ചിനെ പരിഹസിച്ചവര്‍ക്ക് കിട്ടിയത് ഒരു ഒന്നൊന്നര പണിയായിപ്പോയി

തിരൂര്‍ : സോഷ്യല്‍ മീഡിയ പ്ലാറ്റ് ഫോമായ ടിക് ടോകിലെ നില്ല് നില്ല് ചലഞ്ച് മലപ്പുറം ജില്ലയിലെ തിരൂരില്‍ സംഘര്‍ഷത്തില്‍ കലാശിച്ചു. വിദ്യാര്‍ത്ഥികളും നാട്ടുകാരും തമ്മില്‍ ക്രിക്കറ്റ് ബാറ്റും സ്റ്റമ്പും കത്തിയും കുറുവടികളുമായി നടന്ന സംഘര്‍ഷത്തില്‍ സ്ത്രീയടക്കം എട്ടുപേര്‍ക്ക് പരിക്കേറ്റു.

ഓടുന്ന വാഹനം തടഞ്ഞുനിര്‍ത്തി മരച്ചില്ലകളും കൈയിലേന്തി ജാസി ഗിഫ്റ്റ് പാടിയ നില്ല് നില്ല് നീലക്കുയിലേ എന്ന പാട്ടിനൊപ്പം നൃത്തം ചെയ്യുന്നതാണ് ടിക് ടോകിലെ നില്ല് നില്ല് ചലഞ്ച്. വെള്ളിയാഴ്ച്ച നഗരത്തില്‍ ഓടുന്ന വാഹനം തടഞ്ഞുനിര്‍ത്തി നൃത്തം ചെയ്തതാണ് സംഘര്‍ഷത്തിന് കാരണമായത്. ഗതാഗതകുരുക്ക് വന്‍ ജനരോക്ഷത്തിന് കാരണമായതോടെ തുടങ്ങിയ സംഘര്‍ഷാവസ്ഥ അന്ന് മുതിര്‍ന്നവര്‍ ഇടപെട്ട് പരിഹസിച്ചിരുന്നു. എന്നാല്‍ ഇന്നലെ വിദ്യാര്‍ത്ഥികള്‍ സംഘം ചേര്‍ന്ന് സ്ഥലത്തെത്തി നാട്ടുകാരെ മര്‍ദ്ദിക്കുകയായിരുന്നു. കല്ലേറില്‍ തൊട്ടടുത്ത കടയില്‍ ജോലി ചെയ്യുകയായിരുന്ന സുജാതയുടെ തലയ്ക്ക് പരിക്കേറ്റു. കടയിലെ ഗ്ലാസ് പൊട്ടി തലയില്‍ വീണാണ് പരിക്കേറ്റത്. സംഘര്‍ഷത്തിന് ശേഷം വിദ്യാര്‍ത്ഥികള്‍ ഓടി രക്ഷപ്പെട്ടു.സംഭവത്തില്‍ പൊലീസ് അന്വേഷണം തുടരുന്നു.

യുവാക്കള്‍ക്കിടയില്‍ പുതിയ തരംഗം സൃഷ്ടിച്ച ടിക് ടോകിലെ ചലഞ്ചുകള്‍ ഇതിനകം തന്നെ വിവാദമുണ്ടാക്കിയിട്ടുണ്ട്. മരച്ചില്ലുകളുമായി ഓടുന്ന തീവണ്ടിക്ക് മുമ്പിലും പൊലീസ് വാഹനങ്ങള്‍ക്കുമുന്നിലും ബസുകള്‍ക്കുമുന്നിലുമൊക്കെ ചാടി വീഴുന്നത് അപകടങ്ങള്‍ സൃഷ്ടിക്കുമെന്ന് പൊലീസ് മുന്നറിയിപ്പ് നല്‍കിയിരുന്നു.