Twitter 
52 വര്‍ഷങ്ങള്‍ക്കുശേഷം ഒളിംപിക്‌സ് ജിംനാസ്റ്റിക്‌സില്‍ ഇന്ത്യക്ക് നേട്ടം ; ദീപ കര്‍മാക്കര്‍ ഫൈനലിലേക്ക് യോഗ്യത നേടി
റിയോ ഡി ജനീറോ: റിയോ ഒളിംപിക്‌സില്‍ ചരിത്രം കുറിച്ച് ഇന്ത്യയുടെ ദീപാ കര്‍മാകര്‍.ആര്‍ട്ടിസ്റ്റിക് ജിംനാസ്റ്റിക്‌സില്‍ ഒളിംപിക്‌സ് ഫൈനല്‍ യോഗ്യത നേടുന്ന ആദ്യ ഇന്ത്യന്‍ താരമാണ് ദീപ കാര്‍മാക്കര്‍
ആര്‍ടിസ്റ്റിക്‌സ് ജിംനാസ്റ്റിക്‌സില്‍ എട്ടാമതായി ഫിനിഷ് ചെയ്താണ് ദീപ ഫൈനലിലേക്ക് യോഗ്യത നേടിയത്. വോള്‍ട്ട് വിഭാഗത്തിലാണ് ചരിത്രനേട്ടം. 1964ല്‍ പുരുഷവിഭാഗത്തിലാണ് ഇന്ത്യ അവസാനമായി യോഗ്യത നേടിയത്. ആഗസ്ത് 14നാണ് ഈ ഇനത്തില്‍ ഫൈനല്‍ മത്സരം നടക്കുക.
വോള്‍ട്ടിലൊഴികെയുള്ള ഇനങ്ങളില്‍ മികച്ച പ്രകടനം പുറത്തെടുക്കാന്‍ സാധിച്ചിരുന്നില്ല. ഓള്‍ റൗണ്ട് വിഭാഗത്തില്‍ 51ആം സ്ഥാനത്താണ് ദീപ ഫിനിഷ് ചെയ്തത്. ആദ്യ മൂന്ന് ഡിവിഷനുകള്‍ അവസാനിക്കുമ്പോള്‍ വോള്‍ട്ട് ഇനത്തില്‍ ആറാം സ്ഥാനത്തായിരുന്നു ദീപ, എന്നാല്‍ നാലാം ഡിവിഷനില്‍ ഏഴാം സ്ഥാനത്തേക്ക് പിന്തള്ളപ്പെട്ടു, എങ്കിലും അവസാന ഡിവിഷനില്‍ എട്ടാം സ്ഥാനം നിലനിര്‍ത്താന്‍ സാധിച്ചതോടെ ഫൈനല്‍ യോഗ്യതയും നേടി.
ആര്‍ട്ടിസ്റ്റിക്‌സ് ജിംനാസ്റ്റിക്‌സില്‍ വാള്‍ട്ട്, അണ്‍ഇവന്‍ ബാര്‍, ബാലന്‍സ് ബീം, ഫ്‌ളോര്‍ എക്‌സസൈസ് എന്നീ വിഭാഗങ്ങളിലാണ് ദീപ മത്സരിച്ചത്. കഴിഞ്ഞ കോമണ്‍വെല്‍ത്ത് ഗെയിംസിലും ഏഷ്യന്‍ ഗെയിംസിലും ഈയിനത്തില്‍ വെങ്കല മെഡല്‍ ജേതാവായിരുന്നു ദീപ കര്‍മാക്കര്‍.
